Кіріспе
Томас Мункельт (3 тамыз 1952 жылы туған) – Шығыс Германияның зейнеткер спортшысы, 1980 жылғы жазғы Олимпиада ойындарында 110 метрлік кедергілерден жүгіруде жеңімпаз атанған. Шығыс Германияның Лейпциг облысы, Зедтлиц қаласында дүниеге келген Томас Мункельт 1970-ші және 1980-ші жылдардағы Еуропаның үздік кедергілерден жүгірушісі болды. Мункельт 1983 жылы Будапештте 60 метрлік кедергілерден жүгіруде 7.50 секундтық шекті бұзған алғашқы спортшы, ол 7.48 секундтік әлемдік рекордты көрсетті. Мункельт 1975 жылы халықаралық жеңіл атлетика аренасына енді, ол 110 метрлік кедергілерден жүгіруде Шығыс Германияның ұлттық чемпионатында және Еуропа кубогында алғашқы жеңісін одіс етті. 1976 жылғы жазғы Олимпиада ойындарында көңілі толмаған бесінші орынға ие болғанымен, 1977 жылы Әлем кубогы мен Еуропа кубогын жеңіп алды. Оның алғашқы халықаралық чемпионаттан алған медалі 1978 жылғы Еуропа чемпионатында бірінші орынға ие болған кезде келді. Мункельт үшін мансабының жарқын сәті Мәскеу Олимпиадасында болды, онда ол Кубалық Алехандро Касанасты 0,01 секундқа басып озып жеңіске жетті. Сондай-ақ ол бесінші орын алған 4x100 метрлік эстафета командасының құрамында болды. 1982 жылғы Еуропа чемпионатында өзінің титулын сәтті қорғап, 4x100 метрлік эстафета командасының құрамында күміс жүлде алды. Келесі жылы ол тағы да Еуропа кубогын жеңіп алды, бірақ бірінші Әлем чемпионатында тек бесінші орынға қанағат етуге тиіс болды. Шығыс Германия үкіметінің 1984 жылғы жазғы Олимпиада ойындарын бойкоттау туралы шешімін естігеннен кейін Мункельт жеңіл атлетикадан зейнетке шығуға шешім қабылдады. Оның жеке рекордтық көрсеткіші – 1977 жылдың тамызында Хельсинкиде көрсеткен 13,37 секунд. Бұл көрсеткіш оны неміс кедергілерден жүгірушілерінің арасында Флориан Швартхофф, Майк Феннер, Эрик Кайзер, Фальк Балцер, Томас Блашек және Свен Гёлерден кейін жетінші орынға қойды.