Кіріспе

Айнтура (عينطورا; Сирия тілінде: ܥܝܢܛܘܪܐ) – Ливанның Кесерван Жбейл облысының Кесерван ауданындағы қала және муниципалитет. Бейруттен солтүстікке қарай 18 шақырым қашықтықта орналасқан. Айнтураның орташа биіктігі теңіз деңгейінен 230 метрді құрайды, ал жалпы жер ауданы 71 гектарға тең. Қала тұрғындарының көп бөлігі – маронит христиандары.

География

Айнтура Ливанның астанасы Бейруттен солтүстікке қарай 21 шақырым қашықтықта, Ливан тауының төрінде орналасқан. 250 метрлік биіктіктен қарағайлы жасыл алқаптарға және Жерорта теңізіне көрініс ашылады. Айнтураның аумағы 760 000 шаршы метрді құрайды, 3200 тұрғыны бар және өте қолайлы климатқа ие.

Білім

Айнтура ауылы Таяу Шығыстағы алғашқы мектептің ашылуымен мәшһүр. Айнтурадағы Сент-Жозеф колледжі – 1653 жылы негізі салынған Таяу Шығыстағы алғашқы мектеп. Ол сансыз жылдар бойы Иран, Мысыр, Кипр, Сирия және Түркия сияқты аймақтардан келген көрнекті тұлғалардың ұлдарын қабылдады. Христиандар, мұсылмандар және яһудилер, тіпті саяси қарсыластардың балалары да бірге өсіп, дос болып, өзара құрметтестік пен этикалық-моральдық құндылықтарды қадірлейтін білімнің арқасында ортақ құндылықтарды бөлісті. Бұл оқудың нәтижесі аймақтағы саяси дамуға ұзақ мерзімді әсер етті. Ливанның үш бұрынғы президенті – Сүлеймен Франжие, Рене Муавад және Элиас Саркис, сондай-ақ Май Зиаде, Камал Джумблат, Гасан Туени, Морис Джемайел және тағы да көптеген белгілі тұлғалар осы Сент-Жозеф колледжінде білім алған. Сондықтан Айнтура, қарапайым ауыл мектебі емес, лайықты жоғары білім беретін оқу орнына ие. Бұл оқу орны жыл сайын көршілес аймақтардан келген 3800-ге жуық студентті тәрбиелеп келеді. 2000 жылы құрылған Ливан-Канада университеті (LCU) жыл сайын бизнес, ғылым, өнер және гуманитарлық ғылымдар бағытында 1500-ге жуық студентті дипломмен тәмамдайды. Бұл университет Францияның l'Université Montesquieu Bordeaux IV, Grenoble Ecole de Management, IPAC France& Switzerland, Канаданың Université du Quebec in Montreal және Université de Sherbrooke сияқты әлемдік деңгейдегі университеттермен серіктестік етеді.