Кіріспе

Бизнес ұйымы

Халықаралық сауда палатасы (ICC; фр. Chambre de commerce internationale) – әлемдегі ең ірі, ең өкілді бизнес ұйымы. Оның 100-ден астам елдегі 45 миллионнан астам мүшесі жеке кәсіпкерліктің барлық салаларына қызығушылық танытады. ICC-нің қазіргі төрағасы – Мария Фернанда Гарса, ал қазіргі Бас хатшы – Джон В. Х. Дентон АО. ICC-нің үш негізгі қызметі бар: қағидалар белгілеу, дауларды шешу және саясатты қолдау. Мүше компаниялары мен қауымдастықтары халықаралық бизнеспен айналысқандықтан, ICC-нің мемлекеттік шекарадан тыс бизнесті жүргізу қағидаларын жасауда теңдесі жоқ құқығы бар. Бұл қағидалар ерікті болғанымен, олар күн сайын мыңдаған мәмілелерде сақталады және халықаралық сауданың бір бөлігіне айналды. 100-ден астам елдегі ұлттық комитеттердің жаһандық желісі ұлттық және аймақтық деңгейде бизнес мүдделерін қорғайды. ICC-ге мүше компаниялардан тартылған 3000-нан астам сарапшы өз білімі мен тәжірибесін нақты бизнес мәселелері бойынша ICC-нің ұстанымын қалыптастыруға жұмсайды. ICC Біріккен Ұлттар Ұйымының, Дүниежүзілік сауда ұйымының және көптеген басқа халықаралық және аймақтық үкіметаралық органдардың, мысалы G20-ның, халықаралық бизнес атынан жұмысын қолдайды. ICC – БҰҰ Экономикалық және әлеуметтік кеңесінде арнайы консультативтік мәртебе және БҰҰ бақылаушы мәртебесін алған алғашқы ұйым.

Тарих

Халықаралық сауда палатасы 1919 жылы әлемдік бизнеске сауда мен инвестицияларды ынталандыру, тауарлар мен қызметтерге ашық нарықтарды және капиталдың еркін ағынын қамтамасыз ету арқылы қызмет ету мақсатында құрылды. Оның халықаралық хатшылығы Парижде, ал Халықаралық төрелік соты 1923 жылы құрылды. Оның алғашқы төрағасы – Францияның қаржы министрі Этьен Клементель болды.

Мүшелік

Мүшелік ICC ұлттық комитетімен байланыс орнату арқылы немесе ICC халықаралық хатшылығына тікелей өтініш жолдау арқылы қол жеткізіледі.

Дүниежүзілік кеңес

ICC-нің жоғарғы басқару органы – ұлттық комитеттердің өкілдерінен құралған Дүниежүзілік кеңес. Дүниежүзілік кеңес ICC-нің жоғары лауазымдарына, оның ішінде төраға мен төрағаның орынбасарын сайлайды, олардың әрқайсысы үш жылдық мерзімге тағайындалады. Төраға, төрағаның орынбасары және Құрметті төраға (өткен төраға) ұйымға жоғары деңгейдегі басшылықты қамтамасыз етеді.

Атқарушы кеңес

ICC-ге стратегиялық бағытты оның атқарушы кеңесі анықтайды, оған 30-ға дейін бизнес-лидерлер мен қызметтік мүшелер кіреді. Ол Дүниежүзілік кеңес тарапынан төрағалық етушінің ұсынымы бойынша сайланады. Жылына үш рет отырыс өткізетін атқарушы кеңес ICC-нің стратегиялық мақсаттарын белгілеуге және оның саясатын жүзеге асыруды бақылайды.

Халықаралық хатшылық

Парижде орналасқан ICC Халықаралық хатшылығы ICC-нің операциялық бөлімі болып табылады. Ол ICC-нің жұмыс бағдарламасын әзірлейді және іске асырады, сондай-ақ бизнес операцияларына тікелей әсер ететін мәселелер бойынша үкіметаралық ұйымдарға бизнес қағидаларын жеткізеді. Халықаралық хатшылықты Дүниежүзілік кеңес тағайындайтын Бас хатшы басқарады.

Ұлттық комитеттер

Әлемнің 92 елінде мүшелер ICC-нің ұлттық комитеттер деп аталатын ресми құрылымдарын құрған. Ұлттық комитеті жоқ елдерде компаниялар мен ұйымдар, мысалы, сауда-өнеркәсіп палаталары және кәсіби қауымдастықтар тікелей мүшелікке қабылдануы мүмкін.

Қаржы комитеті

Қаржы комитеті атқарушы кеңеске барлық қаржы мәселелері бойынша кеңес береді. Атқарушы кеңес атынан ол бюджетті дайындайды және кеңеске жүйелі түрде есеп қояды. Комитет ICC қызметінің қаржылық салдарына баға береді және ұйымның кірістер мен шығыстарының қозғалысын қадағалайды.

Саясат және бизнес-тәжірибе

ICC саясаты, ережелері және стандарттары мамандандырылған жұмыс органдарымен әзірленеді. Әдеттегі процедура бойынша саяси мәлімдемелер ең алдымен ұлттық комитеттермен кеңесе отырып комиссияда қабылданып, содан кейін атқарушы кеңес бекітеді, одан кейін ғана олар ресми және жария ICC позициялары ретінде қарастырылады. Комиссиялар әлемдік бизнеске қатысты маңызды саяси мәселелерді зерттейді. Әрбір ұлттық комитет немесе топ өздерін ұсыну үшін отырыстарға делегаттарды тағайындай алады. Қызметкерлер төраға мен бас хатшы ұлттық комитеттермен келісе отырып тағайындайды. Комиссиялардың отырыстары әдетте жылына екі рет өтеді. Нақты жобаларды жүзеге асыру және оларды құраушы комиссияға есеп беру үшін түрлі комиссиялар құрамында мерзімдік жұмыс топтары құрылады. Кейбір жұмыс топтарына бірнеше комиссияның өкілдері кіруі мүмкін.

Жарнама және маркетингтік коммуникация практикасы туралы кодекс

2011 жылдың қыркүйегінде Халықаралық сауда палатасы жаңадан жаңартылған, біріктірілген ICC жарнама және маркетингтік коммуникация практикасы кодексін, сонымен қатар www.codescentre.com арнайы веб-сайтын жариялады, ол жарнама және маркетинг саласының мамандарына бүкіл әлем бойынша бағыт-бағдар беруге арналған. Бұл кодекс өнімдер мен қызметтерді таңдау үшін қазіргі тамырбасқан технологиялар, құралдар мен әдістерді пайдаланатын кәсіпорындар үшін этикалық стандарттар мен нұсқауларды белгілейді. Әлемнің барлық аймақтарынан және өнеркәсіптің барлық салаларынан алынған сарапшылармен әзірленген кодекстің мақсаты – маркетингтің жауапкершілікпен жүргізілуі үшін нұсқаулар беру арқылы тұтынушыларды қорғау. Кодекс екі негізгі бөлімнен тұрады: «Жалпы ережелер» және «Тараулар». «Жалпы ережелер» бөлімі барлық БАҚ-тағы барлық маркетингке қолданылатын негізгі принциптер мен кең ұғымдарды қамтиды. Кодекс тараулары егжей-тегжейлі және нақты маркетинг салаларына қолданылады, оның ішінде: Сатуға ынталандыру, Демеушілік, Тікелей маркетинг, Цифрлық медиа және Экологиялық маркетингтік талаптар.

Оқу-жаттығулар мен іс-шаралар

Бүкіл әлемде өткізілетін ICC іс-шаралары, кең ауқымды тақырыптық конференциялардан бастап, шағын топтарға арналған оқу сессияларына дейін алуан түрлі. Бұл кішігірім курстар ICC-нің коммерциялық арбитраж және дауларды шешу механизмдері, сондай-ақ Инкотермс ережелері, құжаттық аккредитивтер бойынша бірыңғай кедендік тәжірибе (UCP) және халықаралық шарттар сияқты сауда құралдары бойынша білімін бөліседі. ICC Academy – Халықаралық сауда палатасының оқу орталығы, ол халықаралық сауданың алдың қатарындағы банктердің, корпорациялардың және басқа да ұйымдардың білім беру қажеттіліктерін қанағаттандыру үшін онлайн сертификаттау және кәсіби даму қызметтерін ұсынады. Арнайы бағдарламалар, электрондық курстар мен сертификаттар Халықаралық сауда палатасының сарапшылары мен тәжірибелі мамандарымен әзірленген.

Жарияланымдар

ICC Publications – Халықаралық сауда палатасының баспа бөлімшесі, ол бизнеске үш негізгі санат бойынша қажетті ресурстарды ұсынады: ICC ережелері мен нұсқаулары, практикалық түсіндірмелер және анықтамалық еңбектер. ICC жарияланымдарының мазмұны ICC комиссияларының, мекемелерінің және жеке халықаралық сарапшылардың жұмысынан туындайды. ICC негізінен халықаралық заңгерлерге, арбитрлерге, банкирлерге, саудагерлерге және студенттерге арналған, халықаралық банк ісі, халықаралық сауда анықтамалары мен шарттары, құқық және арбитраж, контрафактілік және алаяқтық, сондай-ақ үлгілі коммерциялық келісімшарттар сияқты тақырыптарды қамтиды. Ең белгілі жариялымдар, Құжаттық аккредитивтер бойынша бірыңғай ережелер мен тәжірибе және Инкотермс, 30-дан астам тілге аударылған. ICC өз жариялымдарын дәстүрлі қағаз түрінде ғана емес, сонымен қатар электрондық форматта, электрондық кітаптар түрінде ICC дүкенінде ұсынады.

Сыбайлас жемқорлыққа қарсы күрес жөніндегі комиссия

ICC-нің Мінез-құлық қағидалары сыбайлас жемқорлық, қорқыту және пара берумен күресу үшін тиімді және жақсы басқарылатын тұтас бағдарлама құруға бағытталған. ICC-нің Сыбайлас жемқорлыққа қарсы комиссиясы 1999 жылы алғаш рет «Сыбайлас жемқорлыққа қарсы күрес: Корпоративтік тәжірибелер нұсқаулығы» жариялады; нұсқаулықта ICC Мінез-құлық қағидаларын және Экономикалық ынтымақтастық және даму ұйымының (ЭЫДҰ) конвенциясын сақтау үшін егжей-тегжейлі практикалық кеңес берілген. Қағидалар 2003 жылдың 9 желтоқсанында Мексиканың Мерида қаласында қол қойылған Біріккен Ұлттар Ұйымының (БҰҰ) Сыбайлас жемқорлыққа қарсы конвенциясын ескереді. Бизнеске қатысты, жалпы сипаттағы тоғыз Мінез-құлық қағидасы бар, олар ерікті түрде қабылданып, әрбір бизнеске қатысты ұлттық заңнамадағы пара беруге қатысты өзін-өзі реттеу арқылы қолданылады. ICC өзінің және Сыбайлас жемқорлыққа қарсы комиссиясының рөлін Қағидаларды ең кең ауқымда насихаттау деп санайды.

Біріккен Ұлттар Ұйымының өкілдігі

1946 жылдан бері ICC Біріккен Ұлттар Ұйымымен жоғары деңгейдегі консультативтік мәртебеге ие және оның мамандандырылған мекемелерімен тығыз байланыс орнатқан. Қазіргі уақытта БҰҰ-дағы ICC тұрақты өкілі Эндрю Уилсон. 2016 жылғы 21 желтоқсанда Халықаралық сауда палатасына БҰҰ Бас Ассамблеясының A/RES/71/156 Резолюциясы негізінде бақылаушы мәртебесі берілді. 2016 жылғы 13 желтоқсанда ICC-ге БҰҰ Бас Ассамблеясының 193 мүшесі бақылаушы мәртебесін берді. ICC 2017 жылғы 1 қаңтарда Бас Ассамблеядағы бақылаушы лауазымын атқара бастады.