Кіріспе

Жалпы мақсаттағы мобильді робот

Шейки роботы – өз әрекеттері туралы логикалық тұрғыдан ойлай алатын алғашқы жалпы мақсаттағы мобильді робот. Басқа роботтарға үлкен тапсырманы орындаудың әрбір қадамын жеке-жеке түсіндіру қажет болса, Шейки командаларды талдап, оларды өзі дербес негізгі бөліктерге бөле алатын. Осы ерекшелігіне байланысты, жоба робототехника, компьютерлік көру және табиғи тілді өңдеу салаларындағы зерттеулерді біріктірді. Сондықтан, бұл логикалық ойлау мен физикалық іс-қимылды үйлестірген алғашқы жоба болды. Шейки Стэнфорд зерттеу институтының Жасанды интеллект орталығында (қазір SRI International деп аталады) жасалды. Жобаның ең маңызды нәтижелері: A* іздеу алгоритмі, Хауф түрлендіруі және көріну графигі әдісі.

Тарих

Шейки 1966 жылдан 1972 жылға дейін Чарльз Розен, Нильс Нильссон және Питер Харт жоба менеджерлері басшылығымен жасалды. Басқа да маңызды үлес қосқандар: Альфред Брейн, Свен Вальстром, Бертрам Рафаэль, Ричард Дуда, Ричард Фикс, Томас Гарви, Хелен Чан Вольф және Майкл Уилбер. Жобаны Қорғаныс жоғары технологиялық зерттеулер агенттігі (DARPA) қаржыландырды. Қазіргі уақытта қызметтен шыққан Шейки Калифорния штатының Маунтин-Вью қаласындағы Компьютер тарихы мұражайындағы шыны шкафта қойылған. Бұл жоба көптеген робототехникалық жобаларға, ең әйгілісі Centibots-қа үлкен әсер етті.

Жабдық

Физикалық жағынан робот едәуір биік болды, радиобайланыс үшін антеннасы, сонарлық қашықтық өлшегіштер, теледидар камерасы, борттық процессорлар және соқтығысуды анықтау сенсорлары ("соқтығыс сезгіштері") болды. Роботтың биік бойы және дірілдеуге бейімділігі оның атын таңдауға себеп болды:
цитата|Біз оған грекше есімдерден бастап, түрлі атауларды табуға тырысып, бір ай бойы жұмыс істедік, содан кейін біздің біреуіміз: "Эй, ол қатты дірілдейді де қозғалады, оны Шейки деп атайық."|Чарльз Розен

БАҚ және марапаттар

1969 жылы SRI "SHAKEY: Роботтарды оқыту және жоспарлау бойынша тәжірибелер" атты 24 минуттық бейнежазба жариялағаннан кейін, жоба көптеген БАҚ-тың назарына ілікті. Шейки 2004 жылы Карнеги Меллон университетінің Роботтар даңқы залына ASIMO және C 3PO сияқты белгілі тұлғалармен бірге енгізілді. Шейки электр және компьютерлік инженерия саласындағы IEEE Milestone наградасымен марапатталды. Шейки 1967 жылғы BBC – "Болашаққа қадам: Робот" деректі фильмінде көрсетілді.